Постановление ВР АРК (регуляторный акт)

КЪЫРЫМ МУХТАР ДЖУМХУРИЕТИНИНЪ СУВ ОБЪЕКТЛЕРИНДЕ ИНСАНЛАРНЫНЪ АЯТЫНЫ МУАФАЗА ЭТЮВ КЪАИДЕЛЕРИ ТАСДИКЪЛАНМАСЫ АКЪКЪЫНДА

Къырым Мухтар Джумхуриети Анаясасынынъ 16-нджы маддесине, 18-нджи маддесиндеки 1‑нджи къысмынынъ 17-нджи пунктына, 26-нджы маддесиндеки 2-нджи къысмынынъ 1-нджи пунктына, Февкъульаде вазиетлер меселелери боюнджа эм де эалини Чернобыль къазасынынъ акъи­бетинден къорчалав ишлери боюнджа Украина Назирлигининъ 2001 сенеси 3-декабрьде тасдикълангъан Украина сув объектлеринде инсанларнынъ аятыны муафаза этюв Къаиделерининъ 12-пунктындаки 12.6 пунктастына бинаен, Къырым Мухтар Джумхуриетининъ сув объектлеринде къазаларнынъ огюни алмакъ, ватандашларнынъ хавфсыз ве сагълам шараитте раатланувыны теминлемек макъсадынен

Къырым Мухтар Джумхуриетининъ Юкъары Радасы  к ъ а р а р  б е р е:

1. Къырым Мухтар Джумхуриетининъ сув объектлеринде инсанларнынъ аятыны муафаза этюв Къаиделери тасдикълансын (иляве этиле).

2. Девлет къуртарыджы нокъталарнынъ теслим-къабул этмеси ве иши, штаттаки хызметчилернинъ азырлавы, оларнынъ вазифелери акъкъында Низамнаме тасдикълансын (иляве этиле).

3. Къырым Мухтар Джумхуриетиндеки мааллий озь-озюни идаре этюв органлары, район девлет мемуриетлерине тевсие этильсин:

3.1. Бир ай муддет ичинде мезкюр Къарарнынъ 1-нджи пунктында тасдикълангъан Къаиделер Къырым Мухтар Джумхуриетинде сув объектлерини истисал, сагъламлаштырув я да спортнен огърашмакъ макъсадынен эм де ватандашларнынъ раатланувына къулланылагъан, мулькиетнинъ шекилине бакъмадан, ишханелер, муэссиселер ве тешкилятларнынъ дикъкъатына етиштирильсин.

3.2. Эр йыл сагъламлаштыргъан муэссиселернинъ мевсим пляжларынынъ, сув янында ватандашларнынъ кутьлевий раатланув ерлерининъ, ялдагъан васталар, далгъаджылар урбасы, сувда ойнамакъ васталарыны кирагъа берюв нокъталарынынъ ачылувы ялынъыз шеэр шураларнынъ иджра комитетлери я да Къырым Мухтар Джумхуриетинде район девлет мемуриетлерининъ мунасип изинлери иле теминленсин.

3.3. Февкъульаде вазиетлер меселелери боюнджа эм де эалини Чернобыль къазасынынъ акъибетинден къорчалав ишлери боюнджа Украина Назирлигининъ 2001 сенеси 3-декабрьде 272 санлы эмиринен тасдикълангъан Украина сув объектлеринде инсанларнынъ аятыны муафаза этюв Къаиделерининъ 2-пункты 2.6 пунктастындаки, мезкюр Къарарнынъ 1-нджи пунктынен тасдикълангъан, мутехассысча азырлангъан матрос-къуртарыджылар ве керекли къуртарыджы мулькнен текмилленген кенишлетильген девлет мевсим къуртарыджы нокътасыз, пляжларнынъ этрафы тедкъикъи этильмеген ве темизленмеген алда умумий фадаланувда олгъан пляжлар ве сагъламлаштырув муэссиселернинъ ачылувыны ве ишлетмесини ясакълагъан Къаиделернинъ 2-нджи пунктнынъ 2.10 пунктастындаки талапларына къатий риает этюви теминленсин.

4. Къырым Мухтар Джумхуриетинде сув объектлерини истисал, сагъламлаштырув я да спортнен огърашмакъ макъсадынен эм де ватандашларнынъ раатланувына къулланылгъан мулькиетнинъ шекилине бакъмадан, ишханелер, муэссиселер ве тешкилятларнынъ реберлери:

4.1. Эр йыл курорт мевсими башланмаздан эвель озь васталары эсабындан Украина Девэмеккъорчнезарети органларындан зиядесинен хавфлы (сувасты ишлер) ишлернинъ эда этмесине изини олгъан эм де Къырым Мухтар Джумхуриетинде Украина ФВН Баш идаресинде аттестация кечкен мутехассыс далгъаджыларнынъ ярдымынен инсанларнынъ ювунмасына бельгиленген ерлернинъ сув тюбюни тедкъикъ этип, ят шейлерден темизлесинлер.

4.2. Эр бир раатланув зонасынынъ хусусиетлерини ве пляжларнынъ иш вакътыны козьде тутып, девлет къуртарыджы нокъталарнынъ иш джедвеллерини бельгилесинлер.

4.3. Къуртарыджы нокъталарны одалар, донатма, санитар чанталары, такъымынен тиббий алет ве иляджларнен текмилленген, зарар корьгеннинъ ташымасы ичюн васталар, керекли корьгезме тешвикъатнен теминлесинлер.

4.4. Эр йыл 1-нджи майыскъа къадар Къырым Мухтар Джумхуриетинде Украина ФВН Баш идаресининъ территориаль болюклерине къуртарыджы нокъталар штат боюнджа хызмет этеджек матрос-къуртарыджы, ялдайыджы-далгъаджы, тиббий хадимлер эм де къуртарыджы мулькнен теминленгени акъкъында малюмат берсинлер.

5. Къырым Мухтар Джумхуриетинде Украина ФВН Баш идаресине тевсие этильсин:

5.1. Берильген векялетлик сынъырларында мезкюр Къарарнынъ 1-нджи пунктында тасдикълангъан Къаиделерине риает этильмесининъ эм де девлет къуртарыджы нокъталары ишининъ незарети эда этильсин.

5.2. Эр йыл Украина Тасиль ве илим Назирлигининъ мунасип изини олгъан тешкилятларда матрос-къуртарыджыларнынъ огретюви (гъайрыдан азырлавы) тешкилятландырылсын.

5.3. Кутлевий хабер васталары ярдымынен эали арасында эм де сув янында ватандашларнынъ кутьлевий раатланув ерлеринде сувда озюни алып барув  ве зарар корьгенлерге ярдым этмек къаиделери акъкъында хабер-анълатув иши алып барылсын.

6. Къырым Мухтар Джумхуриетинде мааллий озь-озюни идаре этюв органларына мезкюр Къарарнынъ 1-нджи пунктынен тасдикълангъан Украинанынъ сув объектлеринде инсанларнынъ аятыны муафаза этюв Къаиделерининъ 12-нджи пунктындаки 12.6 пунктастына бинаен мааллий сув объектлерининъ хусусиетлерини козьде тутып, инсанларнынъ аятыны муафаза этюв ерли къаиделер ишлеп чыкъармакъ ве тасдикъламакъ тевсие этильсин.

7. Къуветини джойгъан киби танылсын:

Къырым Мухтар Джумхуриети Юкъары Радасынынъ 2003 сенеси 21-майыста къабул олун­гъан «Къырым Мухтар Джумхуриетинде сув объектлериндеки пляжларнынъ тешкилятландырувы ве донатылмасы боюнджа Къаиделер акъкъында» 567-3/03 санлы Къарары  (Къырым Мухтар Джумхуриетининъ норматив-укъукъий актлар топламы, 2003 с., № 5, 439 мад.; 2004 с., № 12, 1102 мад.);

Къырым Мухтар Джумхуриети Юкъары Радасынынъ 2004 сенеси 22-декабрьде къабул олунгъан «Къырым Мухтар Джумхуриети Юкъары Радасынынъ 2003 сенеси 21-майыста къабул олунгъан 567-3/03 санлы Къарарынен тасдикълангъан  Къырым Мухтар Джумхуриетинде сув объектлериндеки пляжларнынъ тешкилятландырувы ве донатылмасы боюнджа Къаиделерге денъишмелер кирсетильмеси акъкъында» 1169-4/04 санлы Къарары (Къырым Мухтар Джумхуриетининъ норматив-укъукъий актлар топламы, 2004 с., № 12, 1102 мад.).

8.Мезкюр Къарар къабул этильген кунюнден арекетке кире.