КъМДж ЮР Къарары

КЪЫРЫМ МУХТАР ДЖУМХУРИЕТИНИНЪ БЮДЖЕТИ ВАСТАЛАРЫ ЭСАБЫНДАН ЭДА ЭТИЛЬГЕН КЪЫРЫМ МУХТАР ДЖУМХУРИЕТИНДЕ 2006-2010 СЕНЕЛЕРИ ДЕВАМЫНДА СЮРГЮН ОЛУНГЪАН ВАТАНДАШЛАРНЫНЪ ЕРЛЕШТИРЮВИ ВЕ ИЧТИМАИЙ-МЕДЕНИЙ ИНКИШАФЫ ПРОГРАММАСЫ АКЪКЪЫНДА

Сюргюн этильген ватандашларнынъ ильк невбеттеки ерлештирюв ве этномедений инкишафы меселелерини чезмек макъсадынен, Къырым Мухтар Джумхуриети Анаясасынынъ 18-нджи маддесиндеки 2-нджи къысмынынъ 17-нджи пунктына бинаен, Украина Назирлер Кабинетининъ 2006 сенеси 11-майыста къабул олунгъан «Сюргюн олунгъан ве Украинагъа авдет олгъан къырымтатарлар ве дигер миллет векиллерининъ ерлештирюви, оларнынъ алышувы ве украин джемиетине интеграциясы Программасынынъ 2010 сенесине къадар муддетке тасдикъланмасы акъкъында» 637 санлы къарарынынъ эда этильмеси ичюн

Къырым Мухтар Джумхуриетининъ Юкъары Радасы  к ъ а р а р  б е р е:

1. Къырым Мухтар Джумхуриетининъ бюджети васталары эсабындан эда этильген Къырым Мухтар Джумхуриетинде 2006-2010 сенелери девамында сюргюн олунгъан ватандашларнынъ ерлештирюви ве ичтимаий-медений инкишафы Программасы тасдикълансын (илериде — Программа) (иляве этиле).

2. Къырым Мухтар Джумхуриетининъ Назирлер Шурасы:

2.1. Къырым Мухтар Джумхуриетининъ бюджети лейихалары шекиллендирильмеси вакъы­тында акъикъий малие-икътисадий имкянлар сынъырында программанынъ омюрге кечирилювине эр сене пара васталарыны козьде тутсын.

2.2. Программанынъ эда этильмеси боюнджа ишлернинъ координациясыны япсын, бундан гъайры онынъ омюрге кечирилювине айырылгъан пара васталарынынъ макъсаткъа файдаланмасыны незарет этсин.

3. Къырым Мухтар Джумхуриетиндеки мааллий озь-озюни идаре этюв органларына ве район девлет мемуриетлерине ерли бюджетлерни шекиллендиргенде сюргюн олунгъан ватандашларнынъ ерлешюви ве ичтимаий-медений инкишафына пара васталары козьде тутмакъ тевсие этильсин.

4. Мезкюр Къарарнынъ эда этильмеси незарети Къырым Мухтар Джумхуриети Юкъары Радасынынъ сюргюн олунгъан ватандашларнынъ меселелери ве миллетлерара мунасебетлер боюнджа Даимий комиссиясына, Къырым Мухтар Джумхуриети Юкъары Радасынынъ икътисадий, бюджет-малие ве берги сиясети боюнджа Даимий комиссиясына, Къырым Мухтар Джумхуриети Юкъары Радасынынъ ичтимаий меселелер ве сагълыкъ сакълав боюнджа Даимий комиссиясына, Къырым Мухтар Джумхуриети Юкъары Радасынынъ медениет, яшлар ишлери ве спорт боюнджа Даимий комиссиясына, Къырым Мухтар Джумхуриети Юкъары Радасынынъ илим ве тасиль боюнджа Даимий комиссиясына авале этильсин.

5.  Мезкюр Къарар къабул этильген кунюнден арекетке кире.