Къырым Мухтар Джумхуриети Анаясасынынъ 17-нджи маддесиндеки биринджи ве экинджи къысымларына, 18-нджи маддесиндеки биринджи къысмынынъ 9-нджы пунктына, 26-нджы маддесиндеки экинджи къысмынынъ 35-нджи пунктына, «Къырым Мухтар Джумхуриетининъ Юкъары Радасы акъкъында» Украина Къанунынынъ 9-нджы маддесиндеки экинджи къысмынынъ 38-нджи пунктына, «Этрафтаки табиат муитини муафаза этюв акъкъында» Украина Къанунынынъ 14-нджи маддесиндеки биринджи къысмынынъ «є» пунктына ве «Украинанынъ табиат-къорукъ фонду акъкъында» Украина Къанунынынъ 23, 25, 27, 39, 51, 52, 53, 54-нджи мадделерине бинаен, айванат ве осюмлик дюньясынынъ генофонду сакъланмасы, къыйметли табиат комплекслери ве объектлерининъ муафазасы, олардан анълакъсал файдаланмасы ве оларнынъ янъартмасы, Къырымнынъ къорулгъан табиат комплекслери ве ландшафтларынынъ муафаза режими кутюльген тарзда табиат шараитлерде семерели туризм, раатлыкъ ве рекреацион фаалиетининъ дигер чешитлери ичюн шараитлер яратмакъ макъсадынен
Къырым Мухтар Джумхуриетининъ Юкъары Радасы к ъ а р а р б е р е:
1. Меганом ярымаданынъ табиат территориясы умумий мейданлыгъы 651,591 га олгъан «Меганом ярымадасы» мааллий эмиети олгъан комплексли табиат ядикярлыгъы киби илян этильсин (1-нджи Илявенинъ 1-нджи пункты).
2. «Меганом ярымадасы» мааллий эмиети олгъан комплексли табиат ядикярлыкънынъ муафаза этильген зонасынынъ умумий мейданлыгъы 850,488 га колеминде тайинленсин (2-нджи Иляве).
3. Тёпе-Оба дагъынынъ табиат территориясы умумий мейданлыгъы 1200 га олгъан «Тёпе-Оба дагъ массиви» мааллий эмиети олгъан небатат къоругъы киби илян этильсин (1-нджи Илявенинъ 2-нджи пункты).
4. «Тынч корьфез» мааллий эмиети олгъан табиат ядикярлыгъы эсасында умумий мейданлыгъы 1508 га олгъан «Тынч корьфез» мааллий эмиети олгъан региональ ландшафт паркы яратылсын (1-нджи Илявенинъ 3-нджи пункты).
5. Янъы яратылгъан «Тынч корьфез» мааллий эмиети олгъан региональ ландшафт паркынынъ мемуриети бир йыл ичинде акъкъыны бельгилеген весикъаларны (топракъ айырув лейихасы, территориянынъ тешкилятландырув лейихасы, региональ ландшафт паркы акъкъында низамнаме) ресмийлештирсин.
6. Къырым Мухтар Джумхуриети Юкъары Радасынынъ 2003 сенеси 22-октябрьде къабул олунгъан «Къырым Мухтар Джумхуриетинде умумдевлет ве мааллий эмиети олгъан табиат-къорукъ фондунынъ территориялары ве объектлери агъыны кенълештирюв ве тертипке кетирюв акъкъында» 709-3/03 санлы Къарарына (Къырым Мухтар Джумхуриетининъ норматив-укъукъий актлар топламы, 2003 с., № 10, 851 мад.) ашагъыдаки денъишме кирсетильсин:
1-нджи пунктнынъ экинджи сатырбашы къуветини джойгъан киби танылсын.
7. Къырым Мухтар Джумхуриетининъ территориясында умумдевлет эмиети олгъан табиат-къорукъ фондунынъ объекти — умумий мейданлыгъы 10900 га олгъан «Тарханкут» Миллий табиат паркы яратылмасы акъкъында Украина Юкъары Радасына риджанаме ёллансын (3-нджи Иляве).
8. Къырым Мухтар Джумхуриетининъ этрафтаки табиат муитини муафаза этюв боюнджа Джумхурий комитети мааллий эмиети олгъан табиат-къорукъ фондунынъ янъы яратылгъан территориялары ве объектлерининъ дегерли къорумасы ве файдаланмасы боюнджа тедбирлернинъ эда этильмесини, оларнынъ сынъырлары бельгиленмесини теминлесин.
9. Мезкюр Къарарнынъ эда этильмеси незарети Къырым Мухтар Джумхуриети Юкъары Радасынынъ аграр ве топракъ меселелери, экология ве табиаттан анълакъсал файдаланув боюнджа Даимий комиссиясына авале этильсин.
10. Мезкюр Къарар къабул этильген кунюнден арекетке кире.
| Къырым Мухтар Джумхуриети Юкъары Радасынынъ Реиси | А. ГРИЦЕНКО |
| Симферополь ш., 2007 сенеси, декабрь 19 № 708-5/07 |