КъМДж ЮР Къарары

КЪЫРЫМ МУХТАР ДЖУМХУРИЕТИ ЮКЪАРЫ РАДАСЫНЫНЪ 2002 СЕНЕСИ 17-ИЮЛЬДЕ КЪАБУЛ ОЛУНГЪАН 183-3/02 САНЛЫ КЪАРАРЫНЕН ТАСДИКЪЛАНГЪАН 2002—2010 СЕНЕЛЕРИНЕ «ШАХСИЙ ЭВ» КОЙДЕ ШАХСИЙ МЕСКЕН КЪУРУДЖЫЛЫГЪЫНА КЪОЛТУТУВ ДЖУМХУРИЕТ ПРОГРАММАСЫНЫНЪ ЭДА ЭТИЛЮВИ КЕТИШАТЫ, ВЕ ОНЪА ДЕНЪИШМЕЛЕР КИРСЕТИЛЬМЕСИ АКЪКЪЫНДА

Къырым Мухтар Джумхуриети Анаясасынынъ 18-нджи маддесиндеки биринджи къысмынынъ 12-нджи пунктына, 26-нджы маддесиндеки экинджи къысмынынъ 11-нджи пунктына бинаен

Къырым Мухтар Джумхуриетининъ Юкъары Радасы  к ъ а р а р  б е р е:

1. Къырым Мухтар Джумхуриети Назирлер Шурасы:

1.1. Шахсий кой къуруджыларынынъ кредитлевине догърутылгъан кредит ресурсларынынъ шекиллендирюв тертиби ве файдаланувыны къарарлаштыргъан норматив-укъукъий эсасыны мукеммеллештирмек боюнджа чарелер корьсин, шу джумледен:

ишлеген ерине бакъмадан джумхуриетнинъ эписи кой сакинлерине, эм де район эмиети олгъан шеэрлерде яшагъан ватандашларгъа Къырым Мухтар Джумхуриети Юкъары Радасынынъ 2002 сенеси 17-июльде къабул олунгъан 183-3/02 санлы Къарарынен тасдикълангъан 2002—2010 сенелерине «Шахсий эв» койде шахсий мескен къуруджылыгъына къолтутув Джумхуриет программасы черчивесинде имтиязлы кредитнен файдаланмакъ акъкъыны такъдим этсин;

район сынъырларында ерлешкен агроистисал комплекси ве гъайрыдан ишлев саасынынъ ишханелеринде, тешкилятларында, муэссиселеринде, койнинъ ичтимаий саасында ве мааллий озь-озюни идаре этюв органларында чалышкъан кой сакинлерине имтиязлы кредит алмакъ устюнлик акъкъыны берсин;

имтиязлы кредитнинъ сынъыр колемини 200,0 бинъ гривнягъадже арттырсын.

1.2. Къырым Мухтар Джумхуриетининъ 2008 сенеси ве илеридеки сенелерге бюджетининъ лейихасыны шекиллендиргенде, 2002—2010 сенелерине «Шахсий эв» койде шахсий мескен къуруджылыгъына къолтутув Джумхуриет программасынынъ малиенен теминлевине, койде шахсий мескен къуруджылыгъына къолтутув Къырым джумхуриет Фондунынъ темель сермиясы яратылмасына масрафларны, эм де шекилленген кредит ресурсларнынъ колеминден 6 файыз къадар шахсий кой къуруджыларына берильген кредитлерге хызмет этмек ичюн масрафларны козьде тутсын.

1.3. Кой эалисине мескен къуруджылыгъы, гъайрыдан къурама ве мескен абаданлаштырувында, шу джумледен коммуналь агълары ве яшалгъан эвлерни теминлев муэндис системлерининъ къуруджылыгъында ярдым боюнджа ишнинъ семерелилигини арттырмакъ макъсадынен Къырым Мухтар Джумхуриети Назирлер Шурасынынъ 2002 сенеси 23-июльде къабул этильген 265 санлы Къарарынен тасдикълангъан койде шахсий мескен къуруджылыгъына къолтутув Къырым джумхуриет Фондунынъ васталары шекилленюв ве файдаланув тертиби акъкъында Низамнамесининъ ве койде шахсий мескен къуруджылыгъына къолтутув Къырым джумхуриет Фонду такъдим эткен кредитлернинъ бермек ве къайтармакъ тертиби акъкъында Низамнамеси мадделерни эсапкъа алып, 2002—2010 сенелерине «Шахсий эв» койде шахсий мескен къуру­джылыгъына къолтутув Джумхуриет программасына денъишмелер кирсетильмеси акъкъында Къырым Мухтар Джумхуриети Юкъары Радасы Къарарынынъ лейихасы Къырым Мухтар Джумхуриети Юкъары Радасынынъ бакъымына тайинленген тертипте кирсетсин.

2. Къырым Мухтар Джумхуриетининъ Къуруджылыкъ сиясети ве мимарджылыкъ Назирлиги кой ерлеринде къурулаяткъан мескен объектлерининъ лейиха-смета весикъаларнынъ ишлеп чыкъарылмасы боюнджа минималь фиятында хызмет косьтерген лейиха япыджы тешкилятларнынъ джедвелини тизсин.

3. Къырым Мухтар Джумхуриети Юкъары Радасынынъ 2002 сенеси 17-июльде къабул олунгъан 183-3/02 санлы Къарарынен (Къырым Мухтар Джумхуриетининъ норматив-укъукъий актлар топламы, 2002 с., № 7, 592 мад.; 2004 с., № 11, 998 мад.) тасдикълангъан 2002—2010 сенелерине «Шахсий эв» койде шахсий мескен къуруджылыгъына къолтутув Джумхуриет программасына ашагъыдаки денъишме кирсетильсин:

мезкюр Программа «2002—2010 сенелерине «Шахсий эв» койде шахсий мескен къуруджылыгъына къолтутув Джумхуриет программасыны 2008—2010 сенелери эда этильмеси боюнджа тедбирлер» Илявесинен текмилленсин (иляве этиле).

4. Къырым Мухтар Джумхуриетининъ мааллий озь-озюни идаре этюв органларына тевсие этильсин:

4.1. Койде шахсий мескен къуруджылыгъына къолтутув региональ программасыны ишлеп чыкъармакъ ве тасдикъламакъ.

4.2. Койде шахсий мескен къуруджылыгъына къолтутув Къырым джумхуриет Фондунен бераберликте Фонднынъ болюклерини тешкилятландырмакъ ве оларнынъ семерели ишлемеси ичюн шараитлер яратмакъ имкяныны бакъмакъ.

4.3. 2002—2010 сенелерине «Шахсий эв» койде шахсий мескен къуруджылыгъына къолтутув Джумхуриет программасынынъ тедбирлерини малиенен теминлемек ичюн джемаатчылыкъларнынъ топракъларында бакъымсыз къалгъан мескен объектлери ве битирильмеген мескен къуруджылыгъы объектлери, шахсий мескен къуруджылыгъы объектлерини ерлештирмек ичюн, шу джумледен айырылгъан, амма ишлетильмеген топракъ дамартылары олгъаны акъкъында, эм де мескен шараитлерини яхшылаштырмакъта мухтадж адамлар, шу джумледен яшлар акъкъында малюмат топламакъ боюнджа иш тешкилятландырылсын ве эр сене мезкюр малюмат койде шахсий мескен къуруджылыгъына къолтутув Къырым джумхуриет Фондуна такъдим этильсин.

5. Къырым Мухтар Джумхуриетинде шеэр (район эмиети олгъан шеэрлер) шуралары идж­ра комитетлерине 2008 сенесине ве илеридеки сенелерге шеэр бюджетлеринде мезкюр шеэрлерде яшагъан шахсий къуруджыларнынъ имтиязлы кредитлевине масрафлар козьде тутулмасы тевсие этильсин.

6. Мезкюр Къарарнынъ эда этильмеси незарети Къырым Мухтар Джумхуриети Юкъары Радасынынъ санайы, къуруджылыкъ, накълие, алякъа ве якъарлыкъ-энергетика комплекси боюнджа Даимий комиссиясына, Къырым Мухтар Джумхуриети Юкъары Радасынынъ аграр ве топракъ меселелери, экология ве табиаттан анълакъсал файдаланув боюнджа Даимий комиссиясына авале этильсин.

7. Мезкюр Къарар къабул этильген кунюнден арекетке кире.