КъМДж ЮР Къарары

КЪЫРЫМ МУХТАР ДЖУМХУРИЕТИ ЮКЪАРЫ РАДАСЫНЫНЪ 2003 СЕНЕСИ 22-ОКТЯБРЬДЕ КЪАБУЛ ОЛУНГЪАН «КЪЫРЫМ МУХТАР ДЖУМХУРИЕТИНДЕ 2003-2012 СЕНЕЛЕРИ ЯШЛАРНЫ МЕСКЕННЕН ТЕМИНЛЕВ БОЮНДЖА РЕГИОНАЛЬ ПРОГРАММАСЫ ТАСДИКЪЛАНМАСЫ АКЪКЪЫНДА» 703-3/03 САНЛЫ КЪАРАРЫНА ДЕНЪИШМЕЛЕР КИРСЕТИЛЬМЕСИ АКЪКЪЫНДА

Къырым Мухтар Джумхуриети Анаясасынынъ 26-нджы маддесиндеки экинджи къысмынынъ 1-нджи пунктына бинаен, яшларны мескеннен теминлев боюнджа тедбирлернинъ омюрге кечирмек ичюн эльверишли шараитлер яратмакъ, Къырым Мухтар Джумхуриети Юкъары Радасынынъ 2003 сенеси 22-октябрьде къабул олунгъан 703-3/03 санлы Къарарынен тасдикълангъан Къырым Мухтар Джумхуриетинде 2003-2012 сенелери яшларны мескеннен теминлев боюнджа Региональ программасыны омюрге кечирмек ичюн Къырым Мухтар Джумхуриетининъ бюджетинден айырылгъан пара васталардан файдаланув незаретини эда этмек макъсадынен

Къырым Мухтар Джумхуриетининъ Юкъары Радасы  к ъ а р а р  б е р е:

1. Къырым Мухтар Джумхуриети Юкъары Радасынынъ 2003 сенеси 22-октябрьде къабул олунгъан «Къырым Мухтар Джумхуриетинде 2003-2012 сенелери яшларны мескеннен теминлев боюнджа Региональ программасы тасдикъланмасы акъкъында» 703-3/03 санлы Къарарына (Къырым Мухтар Джумхуриети Юкъары Радасынынъ норматив-укъукъий актлар топламы, 2003 с., № 10, 845 мад.; 2004 с., № 3, 168 мад.; 2006 с., № 12, 1167 мад.) ашагъыдаки денъишмелер кирсетильсин:

1.1. 4-нджи пункт янъы тарирде арз этильсин:

«4. Мезкюр Къарарнынъ 1-нджи пунктында косьтерильген Программанынъ омюрге кечирмек боюнджа сымарышчы вазифеси «Яшларнынъ мескен кредитлеви фонду» Къырым джумхуриети махсус малие муэссисесине авале этильсин».

1.2. 5-нджи пункт янъы тарирде арз этильсин:

«5. Къырым Мухтар Джумхуриетининъ Назирлер Шурасы Къырым Мухтар Джумхуриетининъ 2008-2012 сенелерине бюджет лейихаларыны шекиллендиргенде, малие имкянлары черчивесинде эр сене Къырым Мухтар Джумхуриетинде 2003-2012 сенелери яшларны мескеннен теминлев боюнджа Региональ программасыны малиенен теминлемек ичюн масрафлар, бундан гъайры кредит ресурсларынынъ 6 файызы — кредитлернинъ такъдим этильмеси ве хызметлеринен багълы масрафларгъа, айры сатыр оларакъ агъымдаки ве темель масрафларгъа эм «Яшларнынъ мескен кредитлеви фонду» Къырым джумхуриети махсус малие муэссисесининъ маддий-техника теминлевине малиевий масрафларны козьде тутсын».

1.3. 7-нджи пункт янъы тарирде арз этильсин:

«7. «Яшларнынъ мескен кредитлеви фонду» Къырым джумхуриети махсус малие муэссисесине эписи мулькиет шекиллери ишханелер ве муэссиселерни ишбирликке джельп этмеси тевсие этильсин».

1.4. 8-нджи пунктта «Къоранта ве  яшлар ишлери боюнджа Къырым Мухтар Джумхуриетининъ Джумхуриет комитети» сёзлери «Къырым Мухтар Джумхуриетининъ яшлар, къоранта ишлери ве гендер сиясети боюнджа Назирлиги» сёзлерине денъиштирильсин.

1.5. Мезкюр Къарарнен тасдикълангъан Къырым Мухтар Джумхуриетинде 2003-2012 сенелери яшларны мескеннен теминлев боюнджа Региональ программасына ашагъыдаки денъишмелер кирсетильсин:

1-нджи болюкнинъ экинджи сатырбашы чыкъарылсын;

2-нджи болюкнинъ алтынджы сатырбашында «оларнынъ эв ходжалыгъыны ерлештирилюви» сёзлери чыкъарылсын;

3-нджи болюкнинъ единджи сатырбашында «Яшлар мескен къуруджылыгъына къолтутув девлет фондунынъ Къырым Мухтар Джумхуриетиндеки Региональ болюгинен» сёзлери «Яшларнынъ мескен кредитлеви фонду» Къырым джумхуриети махсус малие муэссисесинен» сёзлерине денъиштирильсин;

4-нджи болюкнинъ экинджи сатырбашы янъы тарирде арз этильсин:

«2007 сенесинден 2012 сенесине къадар муддет ичинде Программа тедбирлерининъ малиенен теминлеви Къырым Мухтар Джумхуриети бюджетинден, ярдымджы малие менбаларны джельп этип, мааллий бюджетлер, эм де мувафыкъ бюджетлернинъ махсус фондларындан, шу джумледен, яш къоранталаргъа ве янъгъыз яш ватандашларгъа къуруджылыкъкъа (гъайрыдан къурамасына) ве мескен сатын алынмасына эвель такъдим этильген имтиязлы чокъмуддетли кредитлерни къайтарылмасы эсабындан топлангъан паралардан эда этильмеси козьде тутула»;

5-нджи болюк янъы тарирде арз этильсин:

«5. Программанынъ бекленильген нетиджелери

Программанынъ эда этильмеси яшларнынъ мескен меселелерининъ чезильмесине, демография вазиетининъ яхшылаштырылмасына ярдым этеджек, умумий мейданлыгъы 222,4 бинъ м2 зияде олгъан битирильмеген къуруджылыкъны къурып битирмеге имкян яратыр, эм де 4 бинъден зияде яш къоранта ве янъгъыз яш ватандашларны мескеннен теминлер. Бундан гъайры, керекли малиенен теминлев олса, 2 бинъге якъын яш къоранталар ве янъгъыз яш ватандашларны мескен ве шахсий эвлернен теминлемек козьде тутула.

Мунасип косьтергичлерге иришмек ичюн ашагъыдаки тедбирлерни эда этмек козьде тутула:

1. «Халкъ ходжалыгъында кой ве агроистисал комплексининъ ичтимаий инкишафынынъ биринджилиги акъкъында» Украина Къанунына бинаен узакъ кой нокъталарында яшагъан я да оларгъа авушкъан ве агроистисал комплексининъ кой ходжалыгъы, ишлев ве хызмет этюв я да ичтимаий саада ишлеген яш къоранталарны мескенде ве ходжалыкъ ахырларда мухтаджлыгъыны мумкюни къадар толусынен къанаатлендирмек ичюн чарелер корюльсин».

2. Яш къоранталаргъа ве янъгъыз яш ватандашларгъа имтиязлы чокъмуддетли кредитлер такъдим этильмеси вастасы иле койлерде яшларнынъ шахсий мескен къуруджылыгъы инкишафына ярдым этильсин.

3. Къуруджылыкъкъа (гъайрыдан къурамасына) ве мескен сатын алынмасына берильген имтиязлы кредитни алмагъа истеген яш къоранталар ве янъгъыз яш ватандашларнынъ малюмат банкы шекиллендирильсин.

4. Программаны омюрге кечирмек ичюн козьде тутулгъан васталар эсабындан паранен теминленеджек мескен къуруджылыгъы объектлерини бельгилемек ичюн критерийлер джедвели тизильсин.

5. Программанынъ омюрге кечирильмесинде иштирак этеджек банк къурумлары, согъурта компаниялары, эм де къуруджылыкъ тешкилятларыны сечип алмакъ макъсадынен ярыш веси­къалары лейихасы ишлеп чыкъарылсын.

6. Мескенни паранен теминлемек ичюн бюджеттен тыш васталардан файдаланмакъ, эм де мескен къуруджылыгъында ишханелер, муэссиселер, тешкилятларнынъ пай иштираги механизми ишлеп чыкъарылсын.

7. Яш къоранталар ве янъгъыз яш ватандашларгъа къуруджылыкъкъа (гъайрыдан къурамасына) ве мескен сатын алмасына берильген имтиязлы чокъмуддетли кредитлерни къайтарылмасы ве булардан файдалангъанлары ичюн файызлар тёленмеси эсабындан кирген параларны янъы кредитлер айырылмасы тертиби акъкъында инструкция ишлеп чыкъарылсын.

8. Мескеннинъ умумий мейданлыгында 1 м2 фиятыны уджузлатмакъ макъсадынен Программаны омюрге кечирмек черчивесинде яшалгъан эвлернинъ лейихасыны тизгенде ве къуруджылыгъында янъы технологияларнынъ кирсетильмесине къолтутулсын.

9. Программанынъ омюрге кечирильмек кетишатыны кутьлевий хабер васталарында айдынлатылмасы теминленсин.

10. Программаны омюрге кечирмек меселелери боюнджа хабер-анълатув чизгилери олгъан буклетлернинъ нешир олунмасы теминленсин.

11. Программаны эда этюв меселелери боюнджа меслеатлар, семинарлар, конференциялар, тёгерек масалар кечирильмеси тешкилятландырылсын.

1.6. Мезкюр Къарарнен тасдикълангъан бюджет васталары ве бюджеттен тыш менбалар эсабындан Къырым Мухтар Джумхуриетинде 2003-2012 сенелери яшларны мескеннен теминлев Региональ программасыны малиенен теминлев козьде тутулгъан колемлерден мезкюр мундери­джели сатыр чыкъарылсын:

2. Мезкюр Къарар къабул этильген кунюнден арекетке кире.