КъМДж ЮР Къарары

КЪЫРЫМ МУХТАР ДЖУМХУРИЕТИ ЮКЪАРЫ РАДАСЫНЫНЪ БАЗЫ КЪАРАРЛАРЫ ВЕ УКЮМЛЕРИНЕ ДЕНЪИШМЕЛЕР КИРСЕТИЛЬМЕСИ АКЪКЪЫНДА

Къырым Мухтар Джумхуриети Анаясасынынъ 26-нджи маддесиндеки экинджи къысмынынъ 1-нджи пунктына, «Сайлавджыларнынъ Девлет реестри акъкъында» Украина Къанунынынъ 14-нджы маддесиндеки секизинджи къысмынынъ 1-нджи пунктына, Украина Назирлер Кабинетининъ 2007 сенеси 26-июньде къабул этильген «Сайлавджыларнынъ Девлет реестрини алып баргъан орган (болюк) акъкъында ве сайлавджыларнынъ Девлет реестрини идаре этмек региональ органы (болюги) акъкъында типик низамнамелер тасдикъланмасы акъкъында» 868 санлы Къарарына, Украина Назирлер Кабинетининъ 2007 сенеси 18-июльде къабул этильген «Сайлавджыларнынъ Девлет реестрини алып барув органлары (болюклери) ве идаре этмек региональ органлары (болюклери)нинъ мейдангъа кетирювнинъ базы меселелери» 943 санлы Къарарына бинаен

Къырым Мухтар Джумхуриетининъ Юкъары Радасы  к ъ а р а р  б е р е:

1. Къырым Мухтар Джумхуриети Юкъары Радасынынъ 2007 сенеси 21-февральде къабул олунгъан 353-5/07 санлы Къарарынен (Къырым Мухтар Джумхуриетининъ норматив-укъукъий актлар топламы, 2007 с., № 2, 90 мад.) тасдикълангъан Къырым Мухтар Джумхуриетининъ сайлав комиссиясы акъкъында Низамнамесине ашагъыдаки денъишме кирсетильсин:

1.1. I болюкте:

1-нджи пункт мезкюр мундериджели сатырбашынен текмилленсин:

«Сайлавджыларнынъ Девлет реестри акъкъында» Украина Къанунына бинаен Къырым Мухтар Джумхуриетининъ сайлав комиссиясы Къырым Мухтар Джумхуриетинде сайлавджыларнынъ Девлет реестрини идаре этмек региональ органы (болюги) ола»;

2-нджи пункт мезкюр мундериджели 5 ве 6 пунктастларынен текмилленсин:

«5) сайлавджыларнынъ Девлет реестрини яратув ве алып барув меселелери боюнджа тешкилий къолтутувнынъ эда этильмеси, мааллий иджра акимиети органлары, мааллий озь-озюни идаре этюв органлары, муэссиселери, юртлары ве тешкилятларынынъ ишбирлигини теминлемеси;

6) сайлавджыларнынъ Девлет реестрини такъсимлейиджиси къарарларынынъ эда этильмесини незарет япылмасы»;

5-нджи пунктнынъ биринджи сатырбашында «Къырым Мухтар Джумхуриети Юкъары Радасы, мааллий шураларынынъ депутатлары ве кой, къасаба, шеэр галаваларынынъ сайлавлары акъкъында» Украина Къануны» сёзлеринден сонъ «Сайлавджыларнынъ Девлет реестри акъкъында» Украина Къанунынен» сёзлеринен текмилленсин.

1.2. IV болюкте:

24-нджи пунктта:

мезкюр мундериджели 22-25 пунктастларынен текмилленсин:

«22) сайлавджыларнынъ Девлет реестрини яратув ве алып барув джерьянында Къырым Мухтар Джумхуриетинде мааллий иджра акимиети органлары ве мааллий озь-озюни идаре этюв органларынынъ ишбирлигини теминлей;

23) «Сайлавджыларнынъ Девлет реестри акъкъында» Украина Къануны бельгилеген тертипте шахыслар ве сиясий фиркъаларнынъ, шу джумледен сайлавджыларнынъ Девлет реестри болюклерининъ къарарларына, арекетлерине я да арекетсизлигине шикяет этюв мунасебетинен мураджаатларыны бакъа;

24) сайлавлар я да референдумлар таийнленген тарзда сайлавджыларнынъ Девлет реестрини алып барув болюклери сайлавджылар джедвеллерини догъру тизгенлерини тешкере;

25) сайлавджыларнынъ Девлет реестри такъсимлейиджисининъ актлары реестр алып барув болюклери тарафындан эда этмесини незарет эте»;

22-нджи пунктасты мувафыкъ алда 26-нджы пунктасты сайылсын

26-нджи пунктасты янъы тарирде арз этильсин:

«26) «Къырым Мухтар Джумхуриети Юкъары Радасы, мааллий шураларынынъ депутатлары ве кой, къасаба, шеэр галаваларынынъ сайлавлары акъкъында» Украина Къанунында козьде тутулгъан, эм де онъа юкленген «Сайлавджыларнынъ Девлет реестри акъкъында» Украина Къанунына бинаен сайлавджыларнынъ Девлет реестрини идаре этмек региональ органынынъ векялетчилигини эда этмек ичюн керек олгъан дигер векялетчилик ве вазифелерни эда эте».

1.3. V болюкте:

28-нджи пунктнынъ 13-нджи пунктастында «Къырым Мухтар Джумхуриети Юкъары Радасы, мааллий шураларынынъ депутатлары ве кой, къасаба, шеэр галаваларынынъ сайлавлары акъкъында» Украина Къануны» сёзлеринден сонъ «Сайлавджыларнынъ Девлет реестри акъкъында» Украина Къануны» сёзлеринен текмилленсин;

29-нджы пунктта:

мезкюр мундериджели 5 ве 6 пунктастларынен текмилленсин:

«5) «Сайлавджыларнынъ Девлет реестри акъкъында» Украина Къанунына бинаен сайлавджыларнынъ Девлет реестрини идаре этмек боюнджа тедбирлер эда этильмесини теминлей;

6) сайлавджыларнынъ Девлет реестри такъсимлейиджилерининъ къарарлары эда этильмесини незарет эте»;

5 ве 6 пунктастлары мувафыкъ тарзда 7 ве 8 пунктастлары сайылсын.

1.4. VI болюкте:

33-нджи пунктта «Къырым Мухтар Джумхуриети Юкъары Радасы, мааллий шураларынынъ депутатлары ве кой, къасаба, шеэр галаваларынынъ сайлавлары акъкъында» Украина Къануны» сёзлеринден сонъ «Сайлавджыларнынъ Девлет реестри акъкъында» Украина Къанунынен» сёзлеринен текмилленсин;

35-нджи пунктта «Украина Назирлер Кабинетининъ» сёзлеринден сонъ «Меркезий сайлав комиссиясынынъ» сёзлеринен текмилленсин».

2. Къырым Мухтар Джумхуриети Юкъары Радасынынъ 2007 сенеси 21-февральде къабул олунгъан «Къырым Мухтар Джумхуриети сайлав комиссиясынынъ къурумы ве сынъыр микъдары акъкъында» 354-5/07 санлы Къарарына (Къырым Мухтар Джумхуриетининъ норматив-укъукъий актлар топламы, 2007 с., № 2, 91 мад.) ашагъыдаки денъишмелер кирсетильсин:

2.1. 1-нджи пунктта «6» сайысы «7» сайысына денъиштирильсин.

2.2. Мезкюр Къарарнен тасдикълангъан Къырым Мухтар Джумхуриети сайлав комиссиясы эм де онынъ аппаратынынъ къурумы ве сынъыр микъдары янъы тарирде арз этильсин (иляве этиле).

3. Мезкюр Къарар къабул этильген кунюнден арекетке кире.