Къырым Мухтар Джумхуриети Анаясасынынъ 26-нджы маддесиндеки 4-нджи къысмынынъ 1-нджи пунктына, «Девлет ве коммуналь мулькиети объектлерининъ иджареге берюв акъкъында» Украина Къанунына, Къырым Мухтар Джумхуриети Юкъары Радасынынъ 1999 сенеси 21-апрельде къабул олунгъан 459-2/99 санлы Къарарынен тасдикълангъан Къырым Мухтар Джумхуриетининъ мулькюнен я да онынъ идаресине теслим этильген мулькнен идаре этильмеси тертиби акъкъында Низамнамесине бинаен,
Къырым Мухтар Джумхуриетининъ Юкъары Радасы к ъ а р а р б е р е:
1. Къырым Мухтар Джумхуриети Юкъары Радасынынъ 1998 сенеси 19-ноябрьде къабул олунгъан «Къырым Мухтар Джумхуриетине менсюп мулькни иджареге берильмеси ичюн алынгъан уджретнинъ эсаплав, такъсимлев ве файдаланув тертиби Усулиети акъкъында» 274-2/98 санлы Къарарына (Къырым Мухтар Джумхуриетининъ норматив-укъукъий актлар топламы, 1998 с., № 11, 897 мад.; 1999 с., № 3, 196 мад.; 2000 с., № 4, 341 мад.; 2002 с., № 2, 89 мад., № 6, 484 мад.; 2003 с., № 6, 538 мад., № 9, 713 мад.; 2004 с., № 3, 160 мад, № 9, 798 мад., № 11, 994 мад.; 2006 с., № 2, 28 мад.) ашагъыдаки денъишмелер кирсетильсин:
1.1. Мезкюр мундериджели 4, 5 пунктларнен текмилленсин:
«4. Къырым Мухтар Джумхуриетине менсюп олгъан ве Къырым Мухтар Джумхуриетининъ Назирлер Шурасы идареси нуфуз саасына кирген ишханелер ве муэссиселернинъ балансында олгъан ташынмаз мулькнен иджаре акъкъы иле файдаланувгъа теслим этюв эм де иджаре анълашмаларынынъ муддетини арттырув идаре органы ве саибининъ разылыгъы иле озь балансында туткъан ишхане я да муэссисенинъ тешеббюсинен Къырым Мухтар Джумхуриети Мульк фонду тарафындан япылгъаны тайинленсин.
5. Къырым Мухтар Джумхуриетине менсюп мулькнинъ иджаре анълашмаларына мульк саибининъ адындан уйгъунлаштырувы Къырым Мухтар Джумхуриети Юкъары Радасынынъ саиплештирюв меселелери боюнджа Незарет комиссиясы ве Къырым Мухтар Джумхуриети Юкъары Радасынынъ икътисадият, бюджет-малие ве берги сиясети боюнджа Даимий комиссиясынынъ мувафыкъ протоколлары ресмийлештирилюв ёлунен япылгъаны бельгиленсин».
1.2. Къырым Мухтар Джумхуриетине менсюп олгъан мулькиетини иджареге берильмеси ичюн алынгъан уджретнинъ эсаплав, такъсимлев ве файдаланув тертиби Усулиетине ашагъыдаки денъишмелер кирсетильсин:
III болюгинде:
3.1 пунктасты ашагъыдаки сатырбашынен текмилленсин:
«Къырым Мухтар Джумхуриети Назирлер Шурасынынъ Ярдымджы хызмети»;
3.2 пунктастынынъ биринджи сатырбашында «ишхане я да Къырым Мухтар Джумхуриети Юкъары Радасынынъ ишлери Идареси» сёзлери «ишхане, Къырым Мухтар Джумхуриети Юкъары Радасынынъ ишлери Идареси, Къырым Мухтар Джумхуриети Назирлер Шурасынынъ Ярдымджы хызмети» сёзлерине денъиштирильсин;
VI болюгинде:
6.4 пункт мезкюр мундериджели сатырбашынен текмилленсин:
«Къырым Мухтар Джумхуриети Назирлер Шурасынынъ фаалиетини теминлеген мулькке олгъан иджаре анълашмалары боюнджа иджаре уджрети Къырым Мухтар Джумхуриети Назирлер Шурасынынъ Ярдымджы хызметининъ банк эсапларына тюше ве мезкюр мулькнинъ кечиндирювини теминлей».
2. Къырым Мухтар Джумхуриети Юкъары Радасынынъ 2002 сенеси 20-ноябрьде къабул олунгъан 335-3/02 Къарарынен (Къырым Мухтар Джумхуриетининъ норматив-укъукъий актлар топламы, 2002 с., № 11, 1172 мад.; 2006 с., № 7, 496 мад.) тасдикълангъан Къырым Мухтар Джумхуриети Юкъары Радасынынъ саиплештирюв меселелери боюнджа Незарет комиссиясы акъкъында Низамнамесине ашагъыдаки денъишмелер кирсетильсин:
4-нджи пунктнынъ 4.1 пунктасты мезкюр мундериджели сатырбашынен текмилленсин:
«Къырым Мухтар Джумхуриетине менсюп олгъан мулькюне иджаре анълашмаларыны саиби адындан уйгъунлаштыра».
3. Къырым Мухтар Джумхуриети Юкъары Радасынынъ 2002 сенеси 19-июньде къабул олунгъан 135-3/02 Къарарынен (Къырым Мухтар Джумхуриетининъ норматив-укъукъий актлар топламы, 2002 с., № 6, 493 мад.; 2003 с., № 2, 102 мад., № 4, 341 мад.; 2004 с., № 12, 1104 мад.; 2005 с., № 9, 800 мад.) тасдикълангъан Къырым Мухтар Джумхуриети Юкъары Радасынынъ даимий комиссиялары ве оларнынъ вазифелери акъкъында Низамнамесине ашагъыдаки денъишмелер кирсетильсин:
9-нджы бабнынъ 9.3 пунктасты мезкюр мундериджели сатырбашынен текмилленсин:
«Къырым Мухтар Джумхуриети Юкъары Радасынынъ саиплештирюв меселелери боюнджа Незарет комиссиясынен ишбирликте саиби адындан Къырым Мухтар Джумхуриетине менсюп мулькюне иджаре анълашмаларыны уйгъунлаштыра».
4. Мезкюр Къарарнынъ эда этильмеси незарети Къырым Мухтар Джумхуриети Юкъары Радасынынъ саиплештирюв меселелери боюнджа Незарет комиссиясы ве Къырым Мухтар Джумхуриети Юкъары Радасынынъ икътисадият, бюджет-малие ве берги сиясети боюнджа Даимий комиссиясына авале этильсин.
5. Мезкюр Къарар къабул этильген кунюнден арекетке кире.
| Къырым Мухтар Джумхуриети Юкъары Радасынынъ Реиси | А. ГРИЦЕНКО |
| Симферополь ш., 2006 сенеси, сентябрь 22, № 172-5/06 |